ՀՀ ԳԱԱ Պատմության ինստիտուտը Հայոց ցեղասպանության ճանաչմանն ուղղված ծրագրերի շրջանակներում Հայկական հարցի և Հայոց Ցեղասպանության պատմության բաժնի վարիչ Արմեն Մարուքյանի հեղինակությամբ 2014 թ. մարտի 10-ին ընթերցողների դատին ներկայացրեց «Ցեղասպանության հետևանքների հաղթահարման հիմնախնդիրներն ու պատմաիրավական հիմնավորումները» վերնագրով գիտական աշխատությունը: Գրքում գիտական մակարդակով շատ ու շատ հարցերի պատասխաններ են տրված: Փորձ է արվել մեզ հայտնի պատմական փաստերը, դեպքերը, իրադարձությունները տեղափոխել իրավական հարթություն և Միջազգային իրավունքի նորմերի հիման վրա պարզել, թե ինչ հնարավորություններ կան այս հարցը միջազգային դատական ատյաններում բարձրացնելու համար, ինչ խնդիրներ պետք է հաղթահարվեն այդ ճանապարհին և որոնք են դրանց հաղթահարման պատմաիրավական հիմնավորումները: Գրքում փաստերը ներկայացված են այն տեսանկյունից, որոնք մեզանից շատերի համար դեռ անծանոթ են: Հեղինակը անդրադարձել է նաև 1921թ.-ի Կարսի պայմանագրին՝ ցույց տալով, որ այն վավեր չի կարող լինել, ավելին՝ Կարսի պայմանագիրը ապօրինի գործարք էր, ինչը փաթաթեցին Սովետական Հայաստանի վզին:
Գիրքը ունի ռուսերեն ծավալուն հավելված, իսկ մոտ ապագայում կհրատարակվի նաև անգլերեն լեզվով: